Psa 17 | KYG | STEP | O Ala kava nene, hu'na, Alagepa kava'nie'mo ge hisugekae'mo ge'nimo afiyo. Kamalageka hisuvafe'mo nunumu osu'nogi kaipamo namiyo.

Psalms 17

Naha mao, huno nunumu'mo hu'niya gemae

1 O Ala kava nene, hu'na, Alagepa kava'nie'mo ge hisugekae'mo ge'nimo afiyo. Kamalageka hisuvafe'mo nunumu osu'nogi kaipamo namiyo. 2 Kaulagale'mo mai'nisugekae'mo alika fako huka natetekae'mo, alagepa kava'mo hu'nane, huka huvo. Kagaemo alagepa kava'nimo ago.

3 Naipae'mo amalageka hu'nane. Kagaemo hani'ilagamo eka nagetekae'mo namalageka hu'nana'monanafa hosu nagesa ne'afuva kava'nimo o'age'nane. Hosu gemo osuguve, hu'na nago'yamo atale'na ge hu'nove. 4 Ma mopafi vaya'ai kava'apie'mo o'nahau'nige'na nagesa no'afuve. Gekamo afite'nae'mo vaya'mo nehapaeya vekamo ka'ale'mo o'u'nove. 5 Nagaemo kakale'mo ne'u'nae'mo ae'na halu o'valesuvafe'mo natafauvo.

6 O Gotiyo, hu'na, Ge'nimo afa'a afigana'mofe'mo kagaefeke'mo ge hu'nove. Kagetafo hu'neka ge'nimo afiyo. 7 Lamaga kayateti'mo naha maeteka kahau kayamopafi'mo kahau'niya kavakamo age'na nahau aisuva kavakamo alika nave liyo. O Gotiyo, hu'na, kame hapaesayafe'mo hu'naya vaya'ai apayapati'mo apakufamo alika katika ne'apatana Gotigae, hu'na, Naha mao. 8 Vaya'mogimo apaulagale'mo alagepa hu'a ne'yagaiya kava huka yagaika nato. Kahakumo ulunapi'mo alika fala kika nato. 9 Hosu vaya'mogimo kana ya'mo ali'a ne'namiye. Kame vaya'nimogimo nahaesayafe'mo yagai'a ku ai'a nate'nayanagi naha mao.

10 Apaipagu'e vaya'mo mai'nae. Ala apakimo alisayafeke'mo gemo nehae. 11 Apakaemo fai'a ku ai'a late'nae. Laiyakamo agete'a mopafi'mo ali'a yaga au'a latalesayafe'mo nehae. 12 Hapaesayafe'mo yagai'a mai'naya laiyonigana hu'a maige fala kino mai'niya aikeli laiyonigana hu'a maige hu'a mai'nae.

13 O Ala kava nene, hu'na, he tika eka apakae'e'mo fotu nehukae'mo mopafi'mo alika yaga auka apatalo. Kagaemo naipekaleti'mo hosu vaya'ai apayapati'mo nagufamo alika katika nato. 14 O Ala kava nene, hu'na, kayateti'mo ma mopafi vaya'ai apayapati'mo nagufamo alika katika nato. Ma mopafike'mo hetama'apimo hane'niye. Kagaemo fala kino hane'niya alagepa yakamo alika ne'apaminageno'ae'mo apakupafi'mo havai te'niye. Mafa'ne'apimo ne'ya'mo'a apamu pae'niye. Apakaemo kagemi ya'apimo ne'atalage'apae'mo nute mafa'ne'apimogi ne'aliye.

15 Kagemi ya'apimo ne'aliya'monanafa nagaemo fatago kavakamo ali'novanage'na kaugosafi'mo kagegauve. Nagaemo naupati'mo he ti'na kagaekana hu'na mai'ne'nae'mo mago'e kavafe'mo naha'ye osugiye.